25. april 2002

UPA 2002/17

 

A l l a n n g u u t i s s a t u t s i u n n e r s u u t

uunga

 

Illuliortiternernut aningaasalersuineq pillugu Inatsisartut peqqussutaata allanngortinneqarneranik Inatsisartut peqqussutissaattut nr. xx, uu. qqqq 2002-meersussatut siunnersuut.
(Inunnut ataasiakkaanut, suliffeqarfinnut ingerlatseqatigiiffinnullu illuliortiternissanut taarsigassarsisitsisarneq)

 

Aappassaaneerinninnermut Naalakkersuisunit saqqummiunneqartoq.

 

§ 1-imut.

1. § 1, nr. 8 ima oqaasertaqassaaq:
"8. § 10 ima oqaasertaqassaaq:
"§ 10. § 1, imm. 1 naapertorlugu illuliornissamut taarsigassarsianik qinnuteqaatit naalakkersuisunit kommunalbestyrelsimillu suliarineqartussanngorlugit nassiunneqartassapput. Taarsigassarsianik qinnuteqaatit makkuninnga ilaqartinneqartassapput:
1) pilersaarummut tunngavissiaq illut qanoq amerlatiginissaannik aammalu illup tunngavissaata qanoq annertutiginissaanik paasissutissartalik,
2) sanaartornermi aningaasartuutissanut missingersuutit ukiunut agguataakkat,
3) kommunalbestyrelsimit nunaminertamik atugassinneqarsimanermut neriorsuutaagallartoq, aamma
4) § 4, imm. 3 aamma 4 naapertorlugit nammineerluni aningaasaliissutissat pigineqarnerannut uppernarsaat.
Imm. 2. § 4, imm. 2 naapertorlugu kommunalbestyrelsip taarsigassarsinissamik qinnuteqaammik nassiunneqarsimasumik suliarinninnera tassungalu isummernera tunngavigalugit qinnutigineqartut tunniunneqarsinnaanersut qaqugulu tunniunneqarsinnaanerat pillugit Naalakkersuisut aalajangiissapput.""

 

 

Peqqussutissatut siunnersuummut nassuiaatit

 

Nassuiaatit nalinginnaasut

Peqqussutissatut siunnersuummut allannguutissatut siunnersuut saqqummiunneqarpoq Inatsisartut Attaveqarnermut Pilersuinermullu aamma Ineqarnermut Ataatsimiititaliaata 23. april 2002 isumaliutissiissummini kaammattuutaa tunuliaqutaralugu. Ataatsimiititaliap kaammattuutigaa § 10, imm. 1-imi qinnuteqarnissamut piffissaliussaq peerneqassasoq Ataatsimiititaliaq isumaqarmat ukiumoortumik aningaasaliissutini killiliussat iluini taarsigassarsinissamik qinnuteqarnissamut ukioq kaajallallugu periarfissaqartariaqartoq.

Peqqussutissatut siunnersuutip allaffissornikkut kingunerisassai

Peqqussutissatut siunnersuut taarsigassarsinissamik qinnuteqaatinik suliarinninnermut kommunini Namminersornerullutik Oqartussanilu suliat annertusinerannik kinguneqassasoq naatsorsuutigineqarsinnaavoq siunnersuut malillugu taarsigassarsianik qinnuteqaatit ingerlaavartumik nassiunneqarsinnaalissammata. Taamaattumik qinnuteqaatit amerliartuinnarnissaat naatsorsuutigineqarpoq.

Peqqussutissatut siunnersuutip aningaasatigut kingunerisassai

Allannguutissatut siunnersuut toqqaannartumik kinguniusunilluunniit Nunatta karsianut kommuninulluunniit aningaasatigut kinguneqassanngilaq.

 

Aalajangersakkanut ataatsiakkaanut nassuiaatit

§ 1, nr. 1-imut

Aalajangersakkap kingunerissavaa qinnuteqaatit Naalakkersuisunut kommunalbestyrelsinullu qaqugukkulluunniit nassiunneqarsinnaanerat. Tamanna pereerpat suliarinninneq erngerluni aallartinneqarsinnaavoq taarsigassarsisitsinissarlu neriorsuutigineqarsinnaalluni. Aalajangersakkap ki-ngunerissavaa taarsigassarsianik qinnuteqaatinik suliarinnittarnerup suli eqaannerulersinneqarnera, tassa ukiumi aningaasaliiffimmi qinnuteqarfiusumi sanaartornissamut taarsigassarsiat akuersissutigineqarnissaat periarfissinneqarmat.