UPA 2001/30

Nassuiaatit nalinginnaasut

Siunnersuuteqarnermut pissutaasut:

Ilinniarfissuaq Meeqqat atuarfianni ilinniartitsisussanik ilinniartitsineq pillugu Inatsisartut peqqussutaata atuuttup iluarinanngitsortaanik Pisortaqarfimmut tikkuagaqarsimavoq.

Pingaartumik § 3, imm. 2 Naalakkersuisut siunnersuummik matuminnga saqqummiussinerannut tunngaviliisuuvoq. Peqqussummi atuuttumi § 3, imm. 2 naapertorlugu qinnuteqartut allamik naleqquttumik atuagarsornertalimmik ilinniagaqarsimasut ilinniartitsisussatut ilinniarnissamut siammartitamut ilinniartitsisunngornialersinnaatitaapput, taamaattorli § 3, imm. 1-imi ilinniartitsisussatut ilinniarnissamut siammartitamut tiguneqarnissamut tunngasumi atuagarsornertalimmik ilinniagaqarsimanissaq piumasarineqanngilaq.

Taamaammat ilinniartitsisussatut ilinniarnissamut siammartitamut ilinniartunngornissamut piumasaqaatit erseqqissarneqartariaqarput aammalu ilinniartitsisussatut ilinniarnissamut katersuutsitamut siammartitamullu ilinniartunngornissamut aqqutaasartut pisariillisarneqarnissaat kissaatigineqarluni.

Siunnersuutip imai:

Siunnersuut § 2, imm. 2-3-p kiisalu § 3, imm. 2-3-p allanngortinneqarnissaanik imaqarpoq.

Inatsisartut peqqussutaanni atuuttumi § 2, imm. 2 aamma § 3, imm. 2-kkut piumasarineqarpoq ilinniagarisimasap naleqqussusianik Naalakkersuisut pisuni ataasiakkaani tamani akuersissuteqartartussaassasut. Taamaattorli Ilinniarfissuup qinnuteqartut ilinniagarisimasaasa naleqqussusiat nalilersortarsimavaa. Naalakkersuisullumi isumaat naapertorlugu taamaattariaqarpoq, tassami ilinniarfiup pisortaata ilinniartussanik tigusisarneq akisussaaffigimmagu, aammalu ilinniarfiup pisortaa aqutsinikkut ilinniartitsinerullu tungaatigut Naalakkersuisunut akisussaammat. Oqartussaaffiit akisussaaffiillu ataqatigiittariaqarput.

Siunnersuutikkut matumuuna ilinniarfiup pisortaa qinnuteqartunik tigusisarnermut kisimiilluni oqartussaalerpoq, tassa § 2, imm. 1 naapertorlugu tiguneqarsinnaatitaasut tiguneqarnissaannut, kiisalu § 2, imm. 2 aammalu § 3, imm. 1 kiisalu 2 naapertorlugu ataasiakkaarlutik naliliiffigineqarnermikkut tiguneqarsinnaatitaasut tiguneqartarnerinut.

Allaffissornikkut aningaasaqarnikkullu sunniutissai:

Siunnersuut allaffissornikkut aningaasaqarnikkullu sunniuteqartussaanngilaq.

Aalajangersakkat ataasiakkaat nassuiaatitaat

§ 1-imut

Nr. 1-imut

Allanngortitsinerup kingunerisaanik ilinniarfiup pisortaata nammineerluni Naalakkersuisunut (Pisortaqarfimmut) saqqummiusseqqaanngikkaluarluni nalilertalissavaa ilinniakkat suut naleqquttuutinneqassanersut.

Inatsimmi atuuttumi ilinniakkat naleqquttut ilinniakkanut atuagarsornertalinnut killiligaapput. Killiliinneq taanna malinneqartanngilaq, qularutigineqalersinnaasarpormi ilinniakkat suut atuagarsornertaqartutut isigisariaqarnersut. Aamma takukkit § 3, imm. 2-p nassuiaatitai.

Aalajangersakkakkut erseqqissarneqarpoq ilinniarfiup pisortaa qinnuteqartunik allanik ilinniakkanik naleqquttunik allanik ilinniagaqarsimasunik tigusisinnaasoq. Aamma ilinniarfiup pisortaata nammineerluni nalilertassavaa qinnuteqartut tiguneqarnissaannik naliliinermi ilinniarfimmi siunnersuisoqatigiit allat qanoq annertutigisumik peqataatinneqassanersut. Inatsisartut peqqussutaat atuuttoq naapertorlugu ilinniarfiup pisortaata ilinniartitsisut siunnersuisoqatigiivi siunersioriarlugit qinnuteqartut kikkut tiguneqassanersut aalajangertarpaa.

Nr. 2-mut

§ 3 imm. 1, nr. 1 aalajangersagaavoq nutaaq, tassuunalu erseqqivissumik piumasaqaatigineqarpoq qinnuteqartoq piginnaaneqartariaqartoq ilinniartitsisussatut ilinniarnissamut qitiusumut isernissamut piumasaqaatinut assingusunik. Tassa imaappoq qinnuteqartut ilinniarnertuunngorsimasut imaluunniit soorlu EVU-mik ilinniagaqarsimasut ilinniarnertuunngorniarnermut assi-ngusumik ilinniagaqarsimasuusut, § 3, imm. 1 naapertorlugu ilinniartunngornissaminnut tiguneqarsinnaassasut imm. 1, nr. 2-5-ikkut piumasaqaatit sinnerinik naammassinnissimagunik.

§ 3, imm. 1, nr. 2-mi oqaasertaliussanik arlalinnik allannguisoqarpoq. Imarisaanut tunngassuteqartunik allannguisoqanngilaq.

§ 3, imm. 1, nr. 3 oqaaseq "attuumassuteqartumi inuussutissarsiorluni" allanngortinneqarpoq "inuussutissarsiummik suliffeqarsimassasoq". Inuussutissarsiummik suliffeqarsimanissamik piumasaqaateqarnermi pingaarnerpaaq tassaavoq qinnuteqartup suliffeqarnissaminut piukkunnarsisimanissaa meeqqat atuarfianni sulilernissamini misilittakkatut atorsinnaasaminik. Ilinniartitsisutut inuussutissarsiulernissamut naleqqussarneq ilinniarnerup ingerlanerani pisassaaq. Aammattaarlu ilinniartussanik tigooraaniartilluni nalileruminaattarpoq inuussutissarsiutit suut naleqquttutut isigisariaqarnersut. Assersuutigalugu aalisartup/piniartup itigartinnissaa ajornakusuussaaq inuussutissarsiornermigut misilittagaasa pineqartumut attuumassuteqannginnerat pissutigalugu.

§ 3, imm. 1, nr. 4 pisariinnerulersinneqarpoq. § 3, imm. 1, nr. 3-mi aalajangersakkami atuuttumi assigisaani aalajangersagaavoq qinnuteqaateqartoq pilersuisussaatitaassasoq, kommunimit najugarisamit nuunnissaanut akornutaasumik. Peqatigitillugu piumasaqaataavoq sivikinnerpaamik ukioq kingulleq Ilinniarfissuarmiilluni ingerlanneqassasoq. Oqaaseq "akornutaasumik" tamanna tunngavigalugu "ajornakusuulersitsisumik"-nngorlugu allanngortinneqarpoq. Tamatuma kingunerissavaa aalajangersakkap iluarsineqarnera periaatsimut naapertuuttunngorlugu.

§ 3, imm. 1, nr. 5 nutaajuvoq. Piumasaqaalli nutaajunngilaq, kisiannili tiguneqassagaanni piumasaqaatit ilaattut siunnersuummut ilanngunneqarpoq. Tamatuma kingunerissavaa Ilinniarfissuup tiguneqarnermut uppernarsaat nassiukkaangamiuk allakkamini allattassagaa "tiguneqarputit piumasaqaatigalugu ilinniarnerpit nalaani meeqqat atuarfianni timelæreritut atorfeqarnissat qularnaarsimassagit".

Aalajangersagaq § 2, imm. 2-p assigaa. Ilinniarfiup pisortaa qinnuteqartut tamarmik ataasiakkaarlutik ilinniartunngorsinnaassagunik pisinnaasaannik ataasiakkaarinnilluni toqqarlugu nalilersuinissamut annertunerusumik periarfissaqalissaaq, tassami naleqquttumik atuagarsornikkut ilinniagaqarsimanissaq naleqquttumik ilinniagaqarsimanissamut allanngortinneqarmat. Ilinniartunngornissamut piumasaqaatit qasukkarneqarnissaat siunertaanngilaq, kisiannili ilinniakkat sorliit ilinniartitaanermut isissutaasinnaanerat pillugu paasinninnissamik nalornissutaajunnartut pinngitsoortinniarneqarlutik.

Qinnuteqartut atuagarsornikinnarnerusunik ilinniagaliunerusut imm. 2 malillugu tiguneqartassapput, tassami atuagarsornikkut ilinniartitaanerit annertunerujartuinnartumik gymnasiami ilinniartitaanermut assersuunneqartalermata, taamaammat qinnuteqartut taakku imm. 1 malillugu tiguneqartassallutik.

Naleqquttumik ilinniagaqarsimanertut paasineqassaaq ilaatigut inuussutissarsiornermut tunngaviusumik ilinniartitaaneq ilinniartitaaqqinnermik sorlermilluunniit tapertalerlugu, merconomitut ilinniarsimaneq, teknonomitut ilinniarsimaneq, kigutileriffimmi assistentitut ilinniarsimaneq allatullu.

§ 3, imm. 4 nutaajuvoq. Ilinniarfiup pisortaa qanoq ukioqartussaanermut piumasaqaatit immikkut akuersissutigineqarsinnaanerannut periarfissaqalissaaq, taamaalilluni qinnuteqartut utoqqasaajunerusut ilinnialersinnaaniassammata, taakkua imm. 1-imi piumasarisaasut allat naammassisimappatigik. Imm. 1 aamma imm. 2 naapertorlugu qinnuteqartunut piumasaqaatit naapertorlugit ilinnialersussanngortinneqartunut ilinniarfiup pisortaa piumasaqaatinik atortitsinngitsoorsinnaavoq.

Nr. 3-mut

Naalakkersuisut ilinniartitsisussatut ilinniarnissamut siammartitamut ilinniartitaanerup ilusaa aaqqissuussaaneralu pillugit erseqqinnerusunik aalajangersagaliornissaminnut piginnaatitaaffilerneqassapput. Naalakkersuisut ilaatigut nalunaarummi siunertaraat ilinniartitaanerup ilaa qanoq sivisutigisoq minnerpaamik Ilinniarfissuarmi ingerlanneqartassanersoq aamma ilaa qanoq annertutigisoq meeqqat atuarfianni ilinniagaqartup atorfeqarfigisaani ingerlanneqartassanersoq aalajangersagaliornissartik. Siunertarineqarportaaq atorfeqartitaanerup atorunnaarsinneqarneratigut atorunnaarsikkallarneqarneratigulluunniit kingunerisaasussat pillugit aalajangersagaliortoqarnissaa. Taamatuttaaq ilinniagaqartut ilinniaqqilernissaminnut periarfissaat eqqarsaatigalugit.

Naalakkersuisut ilinniartitaanerup naammassineqarnissaanut pisariaqartutut isigaat ilinniagaqartup ilinniagaqarnerup nalaani tamarmi meeqqat atuarfianni timelæreritut atorfeqartitaasarnissaa. Kommunimit taamatullu ilinniagaqartumit atorfeqarnerup atorunnaarsinneqarnissaanik nalunaaruteqarnerup ilinniartitaanerup unitsinneqarnera kingunerissavaa. Taamaalilluni ilinniagaqartoq ilinniagaqarniarluni qinnuteqaqqittariaqalissaaq, tassa ilinniagaqartoq kingusinnerusukkut atorfineqqissagaluaruni. Taamatut pisoqartillugu ilinniartitaanerup ilaanut siusinnerusukkut ingerlanneqareersumut ajunngitsorsiassaqartitsisoqartassaaq. Ilinniarfiup pisortaa ilinnialeqqitsitsinermut atatillugu ajunngitsorsiaqartitsisoqassaneranut aalajangiisuusassaaq. Aammattaaq ilinniarfiup pisortaa ilinniagaqartumut ajunngitsorsiassaqartitaalersumut ilinniartitaanerup ingerlanissaanut aalajangersaasassaaq taamaalillunilu aalajangiisassalluni qaqugukkut ilinniagaqartup ilinniartitaanini aallartissaneraa. Ilinniartunngorniarlutik qinnuteqarsimasut akuerineqarsimanertik imaluunniit itigartinneqarsimanertik pillugu juunimi nalunaarfigineqassapput.

§ 2-mut.

Inatsisartut peqqussutaata ulloq 1. juni atuutilersinneqarnissaanut pissutaavoq najukkamiiginnarluni ilinniartitsisussat ilinniartitaanerannut ilinniagaqalersussat tullii 2002-mi januaarip aallartinnerani aallartittussaammata.